امریکا: ۔بین الاقوامی خبر رساں ادارے روئٹرز کے مطابق ہزاروں کی تعداد میں پرامن مظاہرین نے ڈیموکریٹک نیشنل کنونشن کے پہلے روز شکاگو میں مارچ کیا۔
انہوں نے فلسطین کی حمایت میں نعرے لگائے اور غزہ میں فوری طور پر جنگ بندی کا مطالبہ کیا۔مظاہرین نے جوبائیڈن انتظامیہ کی طرف سے غزہ جنگ میں اسرائیل کی حمایت کے خلاف شدید غم و غصے کا اظہار کرتے ہوئے اسرائیل کی حمایت ختم کرنے پر زور دیا۔
پہلے تو مظاہرین کئی گھنٹوں تک پرامن احتجاج کرتے رہے لیکن پھر اس کے بعد درجنوں مظاہرین سیکیورٹی حصار کو توڑ کر آگے بڑھنے کی کوشش کرنے لگے تاہم امریکی پولیس نے طاقت کا استعمال کرتے ہوئے انہیں آگے بڑھنے سے روک دیا۔ پولیس نے کارروائی کرتے ہوئے متعدد افراد کو گرفتار بھی کرلیا۔
مشتعل مظاہرین نے اپنے غم و غصے کا رخ امریکی نائب صدر کملا ہیرس کی طرف موڑ دیا اور ڈیموکریٹک صدارتی امیدوار کو قاتل کملا قرار دیا۔واضح رہے کہ امریکا میں انتخابی سرگرمیوں کے حوالے سے ڈیموکریٹک پارٹی کے چار روزہ کنونشن کا آغاز ہو گیا ہے۔
کنوشن میں کملا ہیرس کی بطور صدارتی امیدوار نامزدگی کی توثیق کی جائے گی۔
